Les Animaux et leurs attentes Eustache Deschamps (1340 - 1406)

Ou temps jadis, selon les fictions
Des poetes, que les bestes parloient,
Et les oiseaulx, vaches, brebis, moutons,
Cerfs et sangliers, maintefoiz s’assembloient,
Asnes, chevauls, et entreulx ordonnoient
Qui bon seroit pour leur nourissement,
Diversement de leurs vivres jugeoient ;
Chascun juge selon son sentement.

Car les connins, les lièvres, leurs faons,
Herbe, lasson, cholz et grain requeroient ;
Et les asnes demandaient chardons,
Et les brebis la montaigne vouloient,
Vaiches les prez ; les chevaulx demandaient
Avoine et foing, ratelier, logement,
Paille et estrain ; cers les tailliz prenoient :
Chascun juge selon son sentement.

Mais les sangliers veulent les fors buissons,
Les glans des boys, bas lieux ou veruilloient
Et les renars, gelines et chapons,
Et les chievres bois et ronses broutoient ;
Les loups la char, com larrons, ravissoient.
Lyons, lyeppars firent semblablement.
Ainsis entreulx divers vivres prenoient ;
Chascuns juge selon son sentement.

Ostours, gerfaulx, sacres, laniers, faucons
Vouldrent les cuers des oiseaulx qu’ilz chagoient ;
Oes, malars, cercelles et hairons,
Sur les estancs et ruisseaulx se vivoient ;
Gelines, cogs, o les gens habitoient,
Pour avair pain, orge, avaine et froument,
Leurs natures les diversifioient ;
Chascuns juge selon son sentement.

Ainsis est il, se bien garde y prenons,
En l’aage humain et des gens quelz qu’ilz soient,
Tant au secle comme es religions,
Leurs pensées a divers ars s’arroient.
Pas nejugent pluseurs si comme ilz doient,
Ne selon droit, mais naturelement
Selon leurs cuers qui ainsi les desvoient ;
Chascunjuge selon son sentement.

Princes, li sens naturelz est tresbons,
Et li acquis vault merveilleusement ;
Qui a les deux, il est tressaiges homs ;
Chascuns juge selon son sentement.