Les Animaux vantards Eustache Deschamps (1340 - 1406)

Moult se vantoit li cerfs d’estre legiers
Et de courir dix lieues d’une alaine,
Et li cengliers se vantoit d’estre fiers,
Et la brebiz se louoit pour sa laine,
Et li chevriaux de sauter en la plaine
Se vantoit fort, li chevaux estre biaux,
Et de force se vantoit li toreaux,
L’ermine aussi d’avoir biau peligon ;
Adone respont en sa coquille a ciaulx :
« Aussi tost vient a Pasques limegon. »

Les lions voy, ours et lieppars premiers,
Loups et tigres, courir par la champaigne,
Estre chaciez de mastins et levriers
Acris de gens, et s’il est qu’om les praingne
Tant sont hais que chascun les mehaingne
Pour ce qu’ilz font destruction de piaulx ;
Ravissables sont, fel et desloyaulx
Sanz espargner, et pour ce les het on.
Courent ilz bien, sont ilz fors et isneaulx ?
Aussi tost vient a Pasques limegon.

Cellui voient pluseurs par les sentiers :
Enclos se tient en la cruise qu’il maine,
Sanz faire mal le laiss’ on voluntiers,
Tousjours sen va de sepmaine en sepmaine ;
Si font pluseurs en leur povre demaine
Qui vivent bien soubz leurs povres drapeaulx,
Et s’ilz ne font au monde leurs aveaulx,
Si courent ilz par gracieus renon
Quant desliez sont aux champs buefs et veaulx :
Aussi tost vient a Pasques limagon.

Prince, les gens fors, grans, riches, entr’eaulx
Ne tiennent pas toudis une legon ;
Pour eulx haster n’approuche temps nouveaulx :
Aussi tost vient a Pasques limagon.