Le Chat et les Souris Eustache Deschamps (1340 - 1406)

Je treuve qu'entre les Souris
Ot un merveilleux parlement
Contre les chas leurs ennemis,
A veoir maniere comment
Elles vesquissent seurement
Sanz demeurer en tel debat ;
L'une dist lors en arguant :
Qui pendra la sonnette au chat ?

Cilz consaulz fut conclus et peins ;
Lors se partent communement.
Une souris du plat pais
Les encontre et va demandant
Qu'om a fait : lors vont respondant
Que leur ennemi seront mat :
Sonnette aront ou coul pendant.
Qui pendra la sonnette au chat ?

« C'est le plus fort, » dist un rat gris
Elle demande saigement
Par qui sera cilz fais fournis
Lors s'en va chascune excusant
Il n'y oit point d'executant,
S'en va leur besongne de plat ;
Bien fut dit, mais, au demeurant,
Qui pondra la sonnette au chat ?

Prince, on conseille bien souvent,
Mais on pues dire, com le rat,
Du conseil qui sa fin ne prant :
Qui pendra la sonnette au chat ?