Le Rat et la Grenouille Gilles Corrozet (1510 - 1568)
Qui pense mal, mal luy advient.
Souvent reçoit pugnition
Celluy qui faict deception :
Qui contre aultruy quelque mal pense,
Il en reçoit la recompense.
Celluy qui tasche à decepvoir
Son prochain par quelque finesse,
Le mal qu’il vouloit concepvoir
Tumbe sur luy et sy le blesse ;
Quiconcques son prochain oppresse
Et luy veult estre desloyal,
Son peché contre luy s’adresse ;
Pour mal qu’il pense, luy vient mal,
Ainsi qu’à la Grenoille advint
Qui ne faisait que mal penser.
Ung Rat devers elle s’en vint
Pour sur son corps la mer passer.
Tous deux se vont en mer lancer,
Et la Grenoille, en l’eaue plus forte,
Voulut leurs deux piedz entasser,
Et sur son dot ainsi le porte.
La Grenoille falacieuse
Voulut le Rat en mer plonger,
Et tant feit la malicieuse
Qu’es undes le feit submerger ;
Sur elle tumba le danger,
Car une Escoufse en diligence
La vint dessirer et manger
Par droicte et bien juste vengeance.
Titre original : Du Rat et de la Grenoille
