De la Terre qui enfanta une Souris Ysopet I (Moyen Âge)

En une place qui plaine yere,
Enfla la terre en tel maniéré
Que il y ot un si grant mont,
Que tretuit grant paour en ont
Cils du pays communément :
Et cuident bien certainement,
A ce que l'enfléure monstre
Soit senefiance de monstre.
Tel poour ont toutes et tuit,
Qu'a pou que chascuns ne s'enfuit ;
Mes ils ont paour sans raison :
Car quant se vint en la saison
Onques n'issi fors que souris.
Or est passé tout li péris.

Aucuns moût hautement menace,
Et puis ci quierent qui le face :
Maintes gens, a pou d'achoison,
Ont grant péeur en leur maison.
Les montagnes a grant planté
Une souris ont enfanté.
Le sage de l'anflé se moque
Quant ce qui dit tout vient a gogue.
Miex vault pou parler et miex faire.
Ce trouvons nous en ce bestiere :
Qui venteur s'est atourné,
Mocqueur a tantost trouvé.
Personne par sa vanterie,
Ne sera pour ce plus prisie :
Nostre sires les moquera :
Au pseautier ce trouvé sera.