Le Sanglier et l'Âne Gilles Corrozet (1510 - 1568)
Ne faire chose indigne de soy
L’homme sot plain d’oultraige
Au grant veult faire honte ;
Mais vertueux couraige
De tel fol ne tient compte.
Ung Asne lourd, de maulvaise nature,
Ung Porc sanglier moquoit et desprisoit,
Pour l’irriter luy faisoit mainte injure,
Et le Sanglier gravement luy disoit:
« Ô paresseux, contre toy ne m’indigne.
Tu es pourtant de griefve peine digne
Pour ton mal faict et ta temerité ;
Et toutesfois que je n’ay merité
Aulcune honte ou laide moquerie,
Tu es asseur de ma severité
Pour ta paresse et grosse lourderie. »
Ainsy est il que, quand nous oyons dire
Choses qui sont trop indignes de nous,
Combien qu’ilz soient par moquerie ou ire,
Il ne nous fault en prendre aulcun courroux.
Nous ne devons dire ou faire aulcuns signes
Qui soient de nous estranges et indignes.
Ne faisons point deshonneur à nous mesmes
Par faiciz ou dictz, par passions extremes :
Le deshonneur tumbe sur le moqueur
Qui y adjouste injures et blasphemes,
Mais le prudent demeure le vainqueur.
Titre original : Du Sanglier et de l’Asne
