Le Singe et le Renard Gilles Corrozet (1510 - 1568)
Contre richesse superflue
Superfluité
Doit estre tranchée ;
Richesse cachée
Produict pauvreté
Le Singe, ingenieuse beste,
Feit au Regnard une requeste
De luy donner par amytié
De sa queue une grand moytié,
Pour servir a couyrir ses fesses.
Le Regnard, tout plein de finesses,
De ce faire fut refusant,
Et s'excusa en luy disant
Que sa queue ne luy nuysoit
Comme le Singe luy disait,
Et, combien qu'elle feust crotée,
Ne serait point par luy ostée.
Plusieurs sont au Regnard semblables.
Qui ne sont pas plus amyables,
Et ce qu'ilz ont plus d'abundant,
Le refusent au demandant,
Par ung desir d'amour extreme
Qui ne veult du bien qu'a soymesme,,
En laissant perir et gaster
Ce qu'a aultruy peult proufiter.
Titre original : Du Singe et Du Regnard
