Les Oiseaux et les Bêtes Gilles Corrozet (1510 - 1568)
Salaire de desloyauté.
Celluy quien prosperité
Participe avecques les siens
Doit aussi, aprés tant de biens,
Avoir part à l’adversité.
Les oyseaulx livrerent bataille
D’estoc et de taille
Aux bestes qui sont sur la terre.
Chascun a de vaincre esperance
Et asseurance :
Aussi chascun des deux craint guerre.
La Chauve-Souris, non experte,
Craignant que perte.
Vint aux oyseaulx, les delaissa ;
Aux bestes elle s'alla rendre,
Leur party prendre :
Ainsi sa loyaulté froissa.
L’Aigle avec les oyseaulx vollans
Tous bataillans
Eurent sur les bestes victoire,
Dont il s’ensuyvit en fin brefve
La paix et trefve
En tout pays et territoire.
La Chauve-Souris, par son faict
Et grand meffaict,
Pource que son peché luy nuict,
Ne fut en ceste paix comprinse,
Mais fort reprinse.
Depuis ne volla que de nuict.
Titre original : Des Oyseaulx et des Bestes
