La Brebis, la Chèvre, le Cheval, l'Âne et le Lion Eustache Deschamps (1340 - 1406)

Une brebis, une chievre, un cheval
Qui charruoit en une grant arée,
Et .ii. grans buefs qui tirent en un val
Pierre qu’on ot d’un hault mont descavée,
Une vache sanz let, moult descharnée,
Un povre asne qui ses crochez portoit
S’encontrent la, etaux bestes disoit :
Je vien de court. Mais la est uns mestiers
Qui tond et rest les bestes trop estroit.
Pour ce vous pri, gardez vous des barbiers.

Lors li chevauls dit : Trop m’ont fait de mal ;
Jusques aux os m’ont la char entamée :
Soufrir ne puis cuilliere ne poitral.
Les buefs dient ; Nostre pel est pelée.
La chievre dit : Je suis toute affolée.
Et la vache de son veel se plaingoit,
Que mangi¢ ont. Et la brebis disoit :
Panduz soit il qui fist forces premiers ;
Car trois foiz lan n’est pas de tondre droit.
Pour ce vous pri, gardez vous des barbiers.

Ou temps passé tuit li occidental
Orent long poil et grant barbe mellée.
Une foiz Ian tondoient leur bestal,
Et conquistrent mainte terre a l’espée.
Une fois an firent fauchier la prée :
Eulz, le bestail, la terre grasse estoit
En cel estat, et chascuns labouroit.
Aise furent lors noz peres premiers.
Autrement va, chascuns tont ce qu’il voit :
Pour ce vous pri, gardez vous des barbiers.

Et l’asne dit : Qui pert le principal
Et rest le cuir, sa rente est mal fondée :
La beste muert ; riens ne demeure ou pal
Dont la terre puist lors estre admendée,
Le labour fault:plus ne convient qu’om rée
Et si fault il labourer qui que soit,
Ou li barbiers de famine mourroit.
Maisjoie font des peaulx les peletiers ;
Dueil feroient, qui les escorcheroit :
Pour ce vous pri, gardez vous des barbiers.

La chievre adone respondit a estal :
Singes et loups ont ceste loy trouvée,
Et ces gros ours du lion curial
Qui de nopoil ont la gueule estoupée.
Trop souvent est nostre barbe couppée
Et nostre poil, dont nous avons plus froit.
Rere trop pres fait le cuir estre roit :
Ainsi vivrons envix ou voulentiers.
Vive qui puet : trop sommes a destroit :
Pour ce vous pri, gardez vous des barbiers.

Noble lion, qui bien s‘adviseroit
Que par raison son bestail ne tondroit,
Quant il seroit lieux et temps et mestiers.
Qui trop le tond, il se gaste et degoit,
Et au besoing nulle rien ne regoit :
Pour ce vous pri, gardez vous des barbiers.