Le Renard et le Bouc

Guillaume Haudent (? - 1558)

Un fin regnard & subtil par nature
Avec un boucq se trouva d’avanture
Au bord de l’eau, de quelq puis si hault,
Qu’il en failloit yssir a double sault,
Ce que voyant le regnard fine beste.
Lors dict au Boucq, dresser convient ta teste
Et l’estocquer encontre la paroy
Par ce moyen ie failliray sur toy
Et par aprez dessus le bord du puis,
Facillement pourray faillir, & puis
Ie te promectz de t’en tirer dehors.
Le poure boucq creust ce regnard alors
Parquoy s’est prins a estocquer de front
Les piedz en hault & ce Regnard fort promp
Dessus le col luy fault dit premier coup
Et du fécond se iecta bien acoup
Oultre le bord de ce puis ainsi hault,
Par ce moyen le regnard fin & cault
Eschappa lors saultant et goguetant
Dessus le bord de ce puis, entretant
Le poure boucq luy va crier d’enbas,
A faulx regnard ie voy que tu t’esbas
Lassus n’ayant aulcun soucy de moy
En toy ny à promesse qui ait foy
Quand ainsi est que d’ayder a me mettre
Hors de ce lieu tu m’as bien sceu promettre
Mais maintenant ne t’en chault quand tu voys
Estre eschappé par tes fins ambigeois.
Aquoy respond le regnard, poure beste
S’autant de sens tu auoys en la teste
Comme de poil as soubz gorge pendu
Pas en ce lieu ne fusses descendu
Sans adviser premier ainsi que sage
Comme eschapper pouroys de ce passage.

La morale

Ceste fable nous peult apprendre
Qu’un homme sage doibt prevoir
Tousiours la fin que peult avoir
La chose qu’il veult entreprendre.