Du Chat qui savoit tenir une chandoile Marie de France (1160 - 1210)

D’un chat ci apres vous veuil dire
Qui appris fu, par grant maistire,
A servir et tenir chandeille :
Moult en avoient a grant merveille,
Trestout ici qui le veoient.
Li un a l’autre se disoient ;
Que moult parest bien douctrinez.
Uns autres hom s’est pourpenzez
Que le chat taudra son meistier.
Un jour a pris en un moustier
Une soris : et cil l’emporte
Là où li chat la gent déporté.
D’un filet par le pied l’enserre,
Puis le laist aler a la terre,
Avant et arriéré est saillie :
Li chas li voit : si s’entroublie :
De la chandeille ne li chaust.
Ains le laist : si a fait un saut :
La chandeille chei enverse :
Li chas a la souris aerse,
Quar ci ert ses cuers et ses voloirs.

Salemons dist, et si est voirs,
Si est des hoirs a maint haut homme :
En qui de tel, ce est la somme,
Fil a duc, a roi ou a conte,
Que nul en droit a lui n’en monte
Qu’engendré l’a uns de ses sers :
S’est deois qu’il soit fel et anvers.
On fait maint bon par norreture ;
Mais tout adés passe nature.

Fable XXXIII

Notes

Maisdre : maîtrise, enseignement
Taudra : de tollir, tollere
Chaust, de chailloir : importe
Aerse : arrête, prend ; de aertre ou de aherdre
Ci ert : là étoit ; ibi erat