Du Lion qui chei en vieillesse Ysopet I (Moyen Âge)

Li lions qui force et noblesce
Ot jadis, chèi en vielesse,
Si que li faillant tuit li membre,
Li sangliers a qui bien membre
Que li fist jadis le lions,
Li fait recompensassions,
C’est a savoir, plaie pour plaie.
Li touriaux point ne lui soupploie .
Ains le hurte des cornes si fort
Que il i met tout son effort :
Meis l’asne aussi plains de paresse
De ses pies le hurte et le blesse.
Chascune beste li court seure
Et li lions gemist et pleure,
Qui voit qu’a souffrir lui estuet :
Autrement vengier ne se puet
Et dit : Las! je, qui si fort estoie,
Et toutes bestes surmontoie,
Sui maintenant li surmontés :
Perdu ay toutes mes bontés.
Où est m’honneur ? où est ma force ?
Je n’ay mais rien fors que l’escorce.
Cil me nuit a qui j’ai néu :
Si ay-je de maint pitié eu
Qui n’ont ores pitié de moy.
N’est merveilles, si je m’esmoy.

Bien se gart de ceste aventure
Cil qui de faire amis n’a cure,
Et qui, en sa prospérité,
Ne veult du povre avoir pitié,
Et voudroit bien que l’en éust
De li, se ainsy li mescheut.
L’en sieult moult louer la pecune
Quis amis a son maistre amene
Quant l’homs a grant prospérité,
D’amis est forment visité ;
Mais quant il chiet en povreté
Déboutés est et degeté.
La fortune qui est jeient
Preuve les amis pour nient.
La mouche ne quiert que le miel;
Cure nulle n’aura de fiel.
I/amour qui est plus prophitable ,
Aujourd’hui est plus delitable
Chascuns veult avoir le délit.
Le pauvre a nulluy n’embelit.
Le loup ne veult que la charoine ,
Et pour lui grant joie demoine :
Et les hommes quierent la proie :
Chascuns du proufit pense et proie. »
Peu est d’amis pour honesté,
Ne en yver ne en esté.