Du Cheval qui mata le Lion Ysopet I (Moyen Âge)

Un chevaux malade paissoit
En un pré ou ung lion passoit.
Le lion qui grant fain avait,
Se pense, quant le cheval voit,
Que il en fera sa cuisine :
Vers li va ; si s'en acousine
Et li dit : Frere, Dieu vous saut.
Je say moult bien que il vous faut :
Pour très bon mire sui tenu :
Si sui de Salerne venu
Pour vous guérir de vostrc mal.
Enguignier cuide le cheval :
Et dit : Je veuil estre, biau sire,
Vostre compaing et vostre mire.
Le cheval qui le barat sent
A ce que il li dit s'assent,
Toutesfois estudie et pense
A trouver sa bonne defense,
Et a celui grever et nuire
Qui est venu pour li destruire,
Si le redeçoit par paroles
Que li lance douces et moles :
Bien puissiés vous venir, biau sire :
Grant mestier avai-je de mire,
Quant Dieu vous a ci envoyé :
Car trop malement m'a plaie
Une ronse qui me blesa
Au pié derrière : par-desa :
Hausse le pié et cil regarde
Qui du barat ne se prent garde,
Mais cuide selui bareter 5
Et prendre au pié et arester.
Si encline sa teste aval.
Savés vous que fist le cheval ?
Du pié le fiert si durement,
Qu'il l'envoie lés lui dorment,
Si qu'a peine esveiller se puct.
A bien peu mourir l'estuet,
Ne puet mouvoir membre qu'il ait.
Le cheval le laisse et s'en vait.
Quant cils revint de pâmoison
Si se condemne par raison,
Et dit : J'ai souffert ce meschief ;
A bon droit m'est venu grief
Je me fesoi-je ses amis
Et si li estoi-je ennemis.
.....
Tiex que l'on est se doit-on faire ;
Mais maintes gens font le contraire.
Qui vuelt de sa prosession
Faire sainte dévision, ?
Drois est que douleur et meschief
Li reviengne desus son chief.
Le sage homme par son savoir
Tricherie ne puet avoir :
Car cils ne fait pas tricherie
Qui a bareter s'estudie,
Pour le bareteur décevoir.
Aussi le trouve-t-on de voir
Au livre de droit et canon.
Le decret de digeste a nom.

Fable XLI

Notes :

S’en acousine : se familiarise avec lui, l’accoste, le traite de cousin
Mire : médecin
S’assoit : consent, donne son assentiment
Plaié : fait une plaie, blessé
Bareter : tromper, ruser
Les, lez : à côté de, près de
Dévision : propos, parole, de déviser