Des Raines qui voudrent avoir Roy Ysopet I (Moyen Âge)

Les renoilles par leur desroy,
Prièrent Dieu pour avair roy,
Non pas une fois seulement,
Mais deux : Dieu s’en rist durement.
Un tref fist chéoir au palu
Auquel atendoient leur salu ;
Cuident que ce soit leur seigneur ;
En l’eaue se plungierent de peeur,
Chascune creint estre esgarée,
Et quant la péeur fut passée,
L’une apres l’autre sus revindrent :
Le tref vidrent : en sus se tindrent.
Quar de leur roy doubter se durent ;
Mais quant vidrent et aparsurent
Que le tref ne se muet de soy,
De prier font le tiers essoy
A Dieu, que roy leur envoit;
Et Dieu qui leur folie voit
Une serpent leur a gettée
Qui les asseult geueule bée ;
Et parmi les madrés les chasse.
La plus cointe ne scet que fasce :
Si crient : Lasses ! que nous ferons ?
Aide Dieu, que nous mourons !
Lasses ! nostre roy nous mengue :
Cy a mal roy qui ses gens tue.
Adonc dit Dieu : Souffrir devés
Le roy que demendé avés.
De l’aise qu’aviés vengera
La paour qui tousjours vous durra.

Bien qui dure n’est prisiez rien :
Par le mal cognoist-on le bien :
Qui assés a, de ce soit liez :
.Sire ne se fasce subgiez :
Qui ne sot onques la froidure,
Le chaut ne cognoist par mesure.
Le mal fait le bien esprouver :
Car qui se veult courrous couver
En richesses et en delis,
Paour ait que ensevelis
Ne soit apres amèrement.
Sage se doit expressément,
Qui bien est, gart qui ne s’en bouge :
Tiengne soy chascun en son bouge.

Notes

Desroy : erreur, égarement
Durement : très-fort
Tref : poutre, solive
Pain : marais, de palus, udis
Doubter : redouter
Asseult : assaut, d’assaillir
Gueule bée : gueule béante
Madrés ou mardres : marais
Cy a mal roy : celui-là a mauvais roi, ou celui est mauvais roi
qui tue ses sujets
Liez : content, de lætus
Subgiez : sujet