Les Membres et l'Estomac Eustache Deschamps (1340 - 1406)

Angoisses sont a moy de toutes pars
Quant les membres voy au chief reveler,
Et le chief voy sortir divers regars,
Et qu'il convient l'un a l'autre mesler,
Le père au fil, seignour son serf tuer,
Ville gaster et destruire pais
Par le default de raison regarder ;
Merveille n'est se j'en suis asbahis.

Le chief ne doit des membres estre espars,
Mais le doivent nourrir et gouverner ;
Le chief leur doit aprandre les doulz ars,
Et cautement sur ses membres regner ;
Se ilz meffont, il doit son droit garder
Moiennement, puis qu'ils se sont subgis :
Se lors les veult jusqu'à mort subjuguer,
Merveille n'est se j'en suy esbahis.

Quand jambe et piet seront destruit et ars,
Que feront mains et bras, au paraler ?
Ventre mourra, li chiefs pour mille mars
Ne pourrait pas ses membres recouvrer ;
L'un sanz l'autre ne puet longues durer.
Qui saiges est sur ces poins ait avis,
Car quant je voy sur ce pluseurs parler,
Merveille n'est si j'en sui eshabis.

ENVOI

Princes, le chiefs doit ses membres amer,
Et contre droit ne les doit entamer,
Et le chief doit d'euls tous estre obeis ;
S'il a besoing, ilz lui doivent aidier.
Mais quant je voy chief et membres troubler,
Merveille n'est si j'en suis asbahis.