La bataille de la Mouche et du Tore Ysopet II (Moyen Âge)
La mouche aati de bataille
Un torel fier et orgueilleus,
Et dit qu’il ne le doubte maille,
Et le défia a l’esteus ;
Quant le Torel a ce véu,
Que la mouche l’a envillé,
D’ire et d’orgueil s’est esméu
Et huile et fait grant tempesté.
La mouche dit : Ne te travaille ;
Trop auras demain a souffrir:
Mienne est l’honneur de la bataille,
Quant se vendra au départir.
Dit li tor : Si je te tenisse,
Je te ferisse, a bon escient,
Tel cop du pié que te féisse
Morir a duel et a tourment.
La mousche dist : Sire Torel,
Soyez ici demain sans faille :
Sachiez, vous y lairez la pel :
Car j’i serai comment qu’il aille.
Le torel si n’oublia mie
De ce que la mousche li dist :
On champ vint plein de félonie,
Ullant et grant tempeste fist.
Et quant la mousche l’a véu,
Si vola en l’air par desseure,
Et dist : Sire, trop es méu :
Près estes de corre moi desseure.
Vous en serez pour fol tenu
De tous ceuls qui vous ont véu :
Nous ne sommes pas pour ygal :
Tu es un grant torel cornu,
Et je un taoncel menu :
Tu te dois combattre au cheval.
Chascuns se moquoit du torel
Qu’il virent mener tel reuel
Contre un taon qui riens ne monte :
Autressi du fort damoisel,
Quant il se prent a un hardel :
Honneur n’en puet avoir, mais honte.
Li riches homs de grant povoir
Ne puet pas grant honeur avoir
D’estrivcr a un non puissant,
Doner li doit de son avoir,
Par raison et faire assavoir
Qu’il le lait en pois aitant.
Fable XXVII
Notes
Aati : défia
Esteus : pour estour, choc, combat
Envillé : avili
Ire : colère, de ira
Hulle, ullant : hurle, hurlant
Taoncel : petit taon
Hardel ou harelle : jeune fille
Aitant : provocant. Malgré ses
provocations, doit le laisser en paix.
